Սույն թվականի սեպտեմբերի 9-ի ՀՀ հանրային ծառայությունները կարգավորող հանձնաժողովի նիստում ընդունված որոշմամբ հստակեցվել է ամրակցված և շարժական կապի ծառայություններ մատուցող օպերատորների կողմից բաժանորդներին ծառայությունների վերաբերյալ մանրամասն տեղեկատվության տրամադրման կարգը։   Նոր կարգավորումների համաձայն՝ սահմանվել է օպերատորի կողմից մատուցված ծառայությունների վերաբերյալ բաժանորդներին տեղեկություններ տրամադրելու ընթացակարգը, որի համաձայն օպերատորը բաժանորդի գրավոր կամ էլեկտրոնային եղանակով հարցման դեպքում տրամադրում է հարցման պահին նախորդող՝ մինչև 1 տարին ներառող՝ բաժանորդի կողմից հայցվող ժամանակահատվածի համար բաժանորդի մուտքային և ելքային զանգերի, ինտերնետ օգտագործման ծավալների, տեքստային հաղորդագրությունների (SMS), միջազգային ռոումինգ ծառայությունների, երրորդ անձանց կողմից կամ համատեղ մատուցված, ինչպես նաև այլ ծառայությունների վերաբերյալ տեղեկություններ, եթե այդ ծառայությունները սակագրվել են և բաժանորդի համար ծառայության վճար առաջացրել։   Նախատեսվել է օպերատորի իրավունքը՝ բաժանորդին տրամադրելու նաև տեղեկություններ այն ծառայությունների մասով, որոնք չեն սակագրվել և բաժանորդի համար ծառայության վճար չեն առաջացրել՝ պայմանով, որ դրանք չտրամադրելու վերաբերյալ տեղեկությունը նախապես հրապարակվում է օպերատորի պաշտոնական ինտերնետային կայքում։ Տեղեկությունները բաժանորդին տրամադրվում են նրա նախընտրած՝ փաստաթղթային և/կամ էլեկտրոնային եղանակով։ Էլեկտրոնային եղանակով տեղեկությունները տրամադրվում են անվճար՝ էլեկտրոնային փոստի, օպերատորի պաշտոնական ինտերնետային կայքի և/կամ շարժական բջջային հավելվածի միջոցով։                    

  Սույն թվականի սեպտեմբերի 4-ին ՀՀ Վարչապետ Նիկոլ Փաշինյանի մասնակցությամբ Դիլիջանում տեղի է ունեցել «Ջրային ոլորտի բարեփոխումներ 2026-2031» խորագրով աշխատաժողովը, որին մասնակցել են ՀՀ հանրային ծառայությունները կարգավորող հանձնաժողովի նախագահ Մեսրոպ Մեսրոպյանը և Հանձնաժողովի անդամ Կամո Սարգսյանը։   Քննարկվել են ջրային ռեսուրսների արդյունավետ կառավարման, ջրի հասանելիության, սակագնային քաղաքականության, ենթակառուցվածքների զարգացման և մասնավոր ներդրումների խթանման հարցերը։   Աշխատաժողովի արդյունքում նախատեսվում է մշակել ջրային ոլորտի բարեփոխումների ճանապարհային քարտեզ։   Ավելին այստեղ ՝ https://shorturl.at/msYPx                 

  Սույն թվականի օգոստոսի 28-ին Հանրային ծառայությունները կարգավորող հանձնաժողովի նախագահ Մեսրոպ Մեսրոպյանը և հանձնաժողովի անդամներն աշխատանքային այց են կատարել «Գազպրոմ Արմենիա» ՓԲԸ-ի շոգեգազային ցիկլով էլեկտրական էներգիա արտադրող «Հրազդան-5» կայան։   Այցի ընթացքում «Գազպրոմ Արմենիա» ՓԲԸ-ի գլխավոր տնօրեն Աշոտ Հակոբյանը և «Հրազդան-5» կայանի տնօրեն Ռուբեն Վարդանյանը հանձնաժողովի ներկայացուցիչներին ծանոթացրել են կայանի գործունեությանը, տեխնիկական հնարավորություններին և վերջին տարիներին իրականացված վերազինումներին։    Քննարկվել են կայանի արդյունավետ և հուսալի շահագործման, ինչպես նաև էներգետիկ համակարգի կայունության ապահովմանն առնչվող հարցեր։Հանձնաժողովի նախագահ Մեսրոպ Մեսրոպյանը կարևորել է ոլորտի ընկերությունների հետ պարբերական աշխատանքային հանդիպումները՝ ընդգծելով համատեղ աշխատանքների կարևորությունը։