Սույն թվականի սեպտեմբերի 17-ին ՀԾԿՀ նախագահ Մեսրոպ Մեսրոպյանն ընդունել է Արժույթի միջազգային հիմնադրամի (ԱՄՀ) հայաստանյան առաքելության ղեկավար Ալեքսանդր Թիմանին և առաքելության էներգետիկ ոլորտի փորձագետներին։   Հանդիպման ընթացքում քննարկվել են Հայաստանի էներգետիկ և ջրային ոլորտների զարգացմանն ու կարգավորմանն առնչվող արդիական հարցեր։    Մասնավորապես, անդրադարձ է կատարվել էլեկտրական էներգիայի կուտակիչ կայանների զարգացման և կիրառման հնարավորություններին, ինչպես նաև դրանց դերին էներգետիկ համակարգի ճկունության և կայունության ապահովման գործում։   Քննարկվել են նաև էլեկտրաէներգիայի սակագնային քաղաքականությանը և սակագների ձևավորմանը վերաբերող հարցեր։   Ջրային ոլորտին առնչվող հարցերի շրջանակում անդրադարձ է կատարվել խմելու և ոռոգման ջրի սակագներին, դրանց ձևավորման և կարգավորման առանձնահատկություններին։   Կողմերը կարևորել են ոլորտի զարգացման ուղղությամբ շարունակական համագործակցությունն ու փորձի փոխանակումը։          

  Սույն թվականի սեպտեմբերի 9-ի ՀՀ հանրային ծառայությունները կարգավորող հանձնաժողովի նիստում ընդունված որոշմամբ հստակեցվել է ամրակցված և շարժական կապի ծառայություններ մատուցող օպերատորների կողմից բաժանորդներին ծառայությունների վերաբերյալ մանրամասն տեղեկատվության տրամադրման կարգը։   Նոր կարգավորումների համաձայն՝ սահմանվել է օպերատորի կողմից մատուցված ծառայությունների վերաբերյալ բաժանորդներին տեղեկություններ տրամադրելու ընթացակարգը, որի համաձայն օպերատորը բաժանորդի գրավոր կամ էլեկտրոնային եղանակով հարցման դեպքում տրամադրում է հարցման պահին նախորդող՝ մինչև 1 տարին ներառող՝ բաժանորդի կողմից հայցվող ժամանակահատվածի համար բաժանորդի մուտքային և ելքային զանգերի, ինտերնետ օգտագործման ծավալների, տեքստային հաղորդագրությունների (SMS), միջազգային ռոումինգ ծառայությունների, երրորդ անձանց կողմից կամ համատեղ մատուցված, ինչպես նաև այլ ծառայությունների վերաբերյալ տեղեկություններ, եթե այդ ծառայությունները սակագրվել են և բաժանորդի համար ծառայության վճար առաջացրել։   Նախատեսվել է օպերատորի իրավունքը՝ բաժանորդին տրամադրելու նաև տեղեկություններ այն ծառայությունների մասով, որոնք չեն սակագրվել և բաժանորդի համար ծառայության վճար չեն առաջացրել՝ պայմանով, որ դրանք չտրամադրելու վերաբերյալ տեղեկությունը նախապես հրապարակվում է օպերատորի պաշտոնական ինտերնետային կայքում։ Տեղեկությունները բաժանորդին տրամադրվում են նրա նախընտրած՝ փաստաթղթային և/կամ էլեկտրոնային եղանակով։ Էլեկտրոնային եղանակով տեղեկությունները տրամադրվում են անվճար՝ էլեկտրոնային փոստի, օպերատորի պաշտոնական ինտերնետային կայքի և/կամ շարժական բջջային հավելվածի միջոցով։                    

  Սույն թվականի սեպտեմբերի 4-ին ՀՀ Վարչապետ Նիկոլ Փաշինյանի մասնակցությամբ Դիլիջանում տեղի է ունեցել «Ջրային ոլորտի բարեփոխումներ 2026-2031» խորագրով աշխատաժողովը, որին մասնակցել են ՀՀ հանրային ծառայությունները կարգավորող հանձնաժողովի նախագահ Մեսրոպ Մեսրոպյանը և Հանձնաժողովի անդամ Կամո Սարգսյանը։   Քննարկվել են ջրային ռեսուրսների արդյունավետ կառավարման, ջրի հասանելիության, սակագնային քաղաքականության, ենթակառուցվածքների զարգացման և մասնավոր ներդրումների խթանման հարցերը։   Աշխատաժողովի արդյունքում նախատեսվում է մշակել ջրային ոլորտի բարեփոխումների ճանապարհային քարտեզ։   Ավելին այստեղ ՝ https://shorturl.at/msYPx