Տեղի է ունեցել ընդլայնված կազմով աշխատանքային խորհրդակցություն, որին մասնակցել են նաև ՀԾԿՀ անդամ Սերգեյ Աղինյանը և Սակագնային քաղաքականության վարչության պետ Աշոտ Ուլիխանյանը։ Խորհրդակցությանը մասնակցել են նաև ՏԿԵՆ փոխնախարար Նարեկ Ապիտոնյանը, ՀԱԷԿ տնօրեն Էդուարդ Մարտիրոսյանը, Միջուկային անվտանգության կոմիտեի տնօրենի պարտականությունները կատարող Խաչատուր Խաչիկյանը և էներգետիկ համակարգի ընկերությունների ղեկավարներ։ Խորհրդակցությանը էդուարդ Մարտիրոսյանը ներկայացրել է ՀԱԷԿ-ի 2-րդ էներգաբլոկի շահագործման ժամկետի երկարաձգման աշխատանքների ընթացքը։ Քննարկվել են ոլորտին վերաբերող մի շարք այլ կարևոր հարցեր։

Սույն թվականի հունիսի 25-ին ՀՀ հանրային ծառայությունները կարգավորող հանձնաժողովի ֆինանսական վերլուծության բաժնի պետ Սևակ Բաբայանը, Դիմումների քննարկման բաժնի պետ Անժելա Առաքելյանը և Տեխնիկական բաժնի խորհրդական Սենիկ Բաբայանը մասնակցել են Բնակարանային կոմունալ ոլորտի աշխատողների միավորում ՀԿ-ի կողմից կազմակերպված ճանաչողական սեմինարի։Սեմինարի ընթացքում ուսանողներին ներկայացվել են ՀԾԿՀ գործառույթները, լիազորություններն ու գործունեության հիմնական ուղղությունները։ Անդրադարձ է կատարվել էներգետիկայի և ջրամատակարարման ոլորտներում իրականացվող կարգավորման գործընթացներին, էլեկտրաէներգետիկական, գազամատակարարման համակարգերում և ջրային ոլորտում սպասարկման որակի ցուցանիշներին և սպառողների կողմից ՀԾԿՀ ներկայացված դիմում-բողոքների քննարկման ընթացակարգերին։ Ուսանողները հարցուպատասխանի ձևաչափով ծանոթացել են կարգավորվող ոլորտի արդի մարտահրավերներին և ստացել են իրենց հետաքրքրող հարցերի պատասխանները։ Սեմինարն անցկացվել է ինտերակտիվ ձևաչափով՝ նպաստելով ուսանողների մասնագիտական գիտելիքների ընդլայնմանը և հանրային ծառայությունների կարգավորման համակարգի վերաբերյալ իրազեկվածության բարձրացմանը։

Հանրապետության նախագահ Վահագն Խաչատուրյանն ընդունել է Հանրային ծառայությունները կարգավորող հանձնաժողովի նախագահ Մեսրոպ Մեսրոպյանին։   Ողջունելով հյուրին՝ Հանրապետության նախագահը կարևորել է հանձնաժողովի դերը երկրի տնտեսական և ենթակառուցվածքային զարգացման գործում՝ ընդգծելով, որ ներկայիս աշխարհաքաղաքական և տարածաշրջանային զարգացումների պայմաններում էներգետիկ ոլորտի կայուն, կանխատեսելի և արդյունավետ գործունեությունը առանձնահատուկ նշանակություն ունի Հայաստանի համար։   Նախագահ Խաչատուրյանը նշել է, որ վերականգնվող և այլընտրանքային էներգետիկայի զարգացման, էներգետիկ անկախության ամրապնդման և ոլորտում իրականացվող բարեփոխումների համատեքստում կարևոր է հանձնաժողովի հետևողական ու համակարգված աշխատանքը։   Մեսրոպ Մեսրոպյանը շնորհակալություն է հայտնել ընդունելության համար և Հանրապետության նախագահին ներկայացրել հանձնաժողովի ընթացիկ գործունեությունը, ոլորտում իրականացվող աշխատանքները և առաջիկա ծրագրերը։   Նա անդրադարձել է էներգետիկ համակարգում առկա ընդհանուր իրավիճակին, ոլորտի առջև ծառացած մարտահրավերներին, ինչպես նաև միջազգային և տարածաշրջանային զարգացումների ազդեցությանը էներգետիկ շուկաների վրա։   Հանդիպման ընթացքում քննարկվել են Հայաստանի էներգետիկ քաղաքականությանն առնչվող մի շարք հարցեր, վերականգնվող էներգիայի աղբյուրների զարգացման հեռանկարները, ներդրումային միջավայրի բարելավմանն ուղղված քայլերը, ինչպես նաև սպառողների շահերի պաշտպանության և հանրային ծառայությունների մատուցման որակի բարձրացման հետ կապված խնդիրները։   Մտքեր են փոխանակվել նաև արագ փոփոխվող աշխարհում էներգետիկ ոլորտի զարգացման միտումների, էներգետիկ անվտանգության ամրապնդման և ոլորտի երկարաժամկետ զարգացման ռազմավարական ուղղությունների շուրջ։        

Սույն թվականի հունիսի 23-ին ՀՀ հանրային ծառայությունները կարգավորող հանձնաժողովում տեղի է ունեցել հանդիպում՝ Հայաստանի տեղեկատվական համակարգերի կարգավորման հանձնաժողովի, Հայաստանի տեղեկատվական համակարգերի գործակալության և հեռահաղորդակցության ոլորտի օպերատորների ներկայացուցիչների մասնակցությամբ։   Քննարկվել են  «Հանրային տեղեկությունների մասին» և «Կիբեռանվտանգության մասին»  օրենքների կիրարկումից բխող էլեկտրոնային հաղորդակցության ոլորտի կարգավորումներին և դրանց առնչությամբ օպերատորների գործունեությանը վերաբերող հարցեր։   Մտքեր են փոխանակվել և պարզաբանումներ տրվել՝ նոր օրենսդրական պահանջների գործնական կիրառման առանձնահատկությունների, տեղեկատվական համակարգերի անվտանգության ապահովման, տվյալների պահպանության և հանրային տեղեկատվության հասանելիության հարցերի, ինչպես նաև պետական և մասնավոր հատվածների միջև տեղեկատվության փոխանակման արդյունավետ գործընթացների ձևավորման առնչությամբ։   Մասնակիցները ներկայացրել են իրենց դիտարկումներն և առաջարկությունները՝ ուղղված կարգավորումների արդյունավետ իրականացմանն ու ոլորտային համագործակցության ամրապնդմանը, և վերահաստատել քննարկվող հարցերի շրջանակում համագործակցությունը շարունակելու պատրաստակամությունը։